मार्था, स्पेन

विदेशमा काम गर्ने सिलसिलामा मेरो ब्वाइफ्रेन्ड र मेरो भेट भएको थियो। हामी दुवैले प्रभु येशूमा विश्‍वास गर्थ्यौँ र सँगै मण्डली जाने गर्थ्यौँ। हामी तीन वर्षदेखि सम्‍बन्धमा थियौँ, र हामीले विवाह गर्ने योजना बनाएका थियौँ। अक्टोबर २००० मा, म मेरी आमालाई भेट्न चीन फर्केर जाँदा, मेरी छिमेकीले मलाई प्रभु येशू फर्केर आइसक्‍नुभएको छ, र मानवजाति स्वर्गको राज्यमा प्रवेश गर्न सकून् भनेर तिनीहरूलाई न्याय गर्न र शुद्ध पार्न, र मानिसहरूलाई पापको बन्धनबाट मुक्त गर्न धेरै सत्यता व्यक्त गर्नुभएको छ भन्दै सर्वशक्तिमान् परमेश्‍वरको आखिरी दिनहरूको कामको गवाही दिइन्। पछि, मैले सर्वशक्तिमान्‌ परमेश्‍वरका धेरै वचनहरू पढेँ, र सर्वशक्तिमान्‌ परमेश्‍वरले मानवजातिलाई मुक्ति दिने परमेश्‍वरको छ हजार वर्षे व्यवस्थापन योजनाको रहस्य, परमेश्‍वरका तीन चरणको कामको भित्री कथा, परमेश्‍वरको देहधारणको रहस्य प्रकट गर्नुभएको रहेछ, र शैतानले मानिसलाई कसरी भ्रष्ट तुल्याउँछ, मानिसहरूलाई मुक्ति दिन परमेश्‍वरले कसरी चरणबद्ध रूपमा काम गर्नुहुन्छ, युगको अन्त्य गर्न परमेश्‍वरले कसरी आखिरी दिनहरूको न्यायको काम गर्नुहुन्छ, आदि इत्यादि कुरा पनि प्रकट गर्नुभएको छ भन्‍ने थाहा पाएँ। मैले धार्मिक विश्‍वासमा रहँदा यी सत्यता र रहस्यहरूका बारेमा कहिल्यै सुनेकी थिइनँ। कुनै पनि सेलिब्रेटी वा महान् व्यक्तिले यी कुराहरू व्यक्त गर्न सकेको थिएन। यसले प्रभु येशूका यी वचनहरूलाई पूर्ण रूपमा पूरा गर्‍यो: “मैले तिमीहरूलाई भन्‍नुपर्ने कुराहरू धेरै छन्, तर अहिले तिमीहरूले ती सहन सक्‍दैनौ। तर, जब उहाँ, अर्थात् सत्यताका आत्मा आउनुहुन्छ, उहाँले तिमीहरूलाई सारा सत्यतामा अगुवाइ गर्नुहुनेछ: किनभने उहाँ आफ्‍नो तर्फबाट बोल्‍नुहुनेछैन; तर उहाँले जे सुन्‍नुहुन्‍छ उहाँले त्यही बोल्‍नुहुनेछ: र उहाँले तिमीहरूलाई आउनेवाला कुराहरू देखाउनुहुनेछ” (यूहन्‍ना १६:१२-१३)। म सर्वशक्तिमान्‌ परमेश्‍वरका वचनहरू सत्यता र परमेश्‍वरका आवाज हुन्, र सर्वशक्तिमान्‌ परमेश्‍वर नै फर्कनुभएका प्रभु येशू हुनुहुन्छ भन्‍ने कुरामा निश्‍चित भएँ। म अत्यन्तै उत्साहित थिएँ, र जतिसक्दो चाँडो मेरो ब्वाइफ्रेन्डलाई यो खुशीको खबर सुनाउन चाहन्थेँ। हामी दुवैले सर्वशक्तिमान्‌ परमेश्‍वरको आखिरी दिनहरूको कामलाई स्वीकार गरेर अन्त्यमा सँगै राज्यमा प्रवेश गर्‍यौँ भने एकदम राम्रो हुन्‍थ्यो। तर मलाई विदेशमा हुँदा, पाष्टर स्यानले “पूर्वीय ज्योति” बाट टाढै बस्‍नु भनेर बारम्बार बताएको कुरा याद आयो। तिनले हामीलाई चीनमा फर्केपछि हामी होशियार हुनू, र पूर्वीय ज्योतिका मानिसहरूसँग कहिल्यै सम्पर्क नरहनू भनी भनेका थिए। तिनी चीनमा झूटा शिक्षाहरू आएका छन्, र होशियार हुनुपर्छ भन्दै चीनका केही सहरहरूमा मण्डली सदस्यहरूलाई भेट्न पनि निरन्तर जाने गरेका थिए। मेरो ब्वाइफ्रेन्डले स्यानलाई निकै आदर गर्थे र तिनले भनेका कुरा सुन्थे। मैले उनलाई सर्वशक्तिमान्‌ परमेश्‍वरका आखिरी दिनहरूको काम स्वीकार गरेकी छु भनेर सीधै बताएँ भने, कहीँ उनले स्यानलाई बताउने त होइन? तर मेरो ब्वाइफ्रेन्डले प्रभु येशूको पुनरागमनको प्रतीक्षा गर्दै आएका छन् भन्‍ने कुरा पनि मलाई थाहा थियो, त्यसकारण जतिसक्दो चाँडो म उनलाई यो कुरा बताउन चाहन्थेँ। यदि मैले उनीसँग स्पष्ट रूपमा सङ्गति गरेँ भने, उनले यसलाई स्वीकार गर्न सक्छन् भन्‍ने लागेको थियो।

एक रात, मैले उनलाई कल गरेर भनेँ, “हामी दुवै प्रभु येशूको पुनरागमनको प्रतीक्षामा छौँ, त्यसकारण प्रभु येशू कसरी आउनुहुनेछ भन्‍ने तिमीलाई लाग्छ?” अनपेक्षित रूपमा, मेरो कुरा सकिनेबित्तिकै, मेरो ब्वाइफ्रेन्डले रिसाउँदै भन्यो, “तिमी मलाई किन अचानक यो प्रश्‍न गर्दै छौ? प्रभु बादलमा आउनुहुनेछ भनेर बाइबलले स्पष्ट रूपमै उल्‍लेख गर्छ, त्यसकारण के त्यसमा कुनै शङ्‍का हुन सक्छ र? घर गएर तिमीले पूर्वीय ज्योतिको मान्छेसँग कुरा गर्‍यौ कि क्या हो?” प्रश्‍न सोध्दा नै उनले यति कठोर प्रतिक्रिया दिएको देख्दा म निकै चकित भएँ। मैले भनेँ, “हामीले प्रभुमा विश्‍वास गरेको धेरै वर्ष भयो, र के हामी दुवैले प्रभुलाई स्वागत गर्ने र स्वर्गको राज्यमा प्रवेश गर्ने दिनको प्रतीक्षा गर्दै आएका छैनौँ र? त्यसो भए प्रभु येशू कसरी आउनुहुन्छ? के यो प्रश्‍न सोच्‍न लायक छैन र?” मेरो ब्वाइफ्रेन्ड अझै रिसायो र भन्यो, “प्रभु येशूको पुनरागमनको प्रचार गर्ने मानिसहरूले झूटो कुरा बोल्दै मानिसहरूलाई छल गरिरहेका हुन्छन् भनेर स्यानले हामीलाई कतिपटक भनेका छन्? हामीले पूर्वीय ज्योतिका मानिसहरूलाई सम्पर्क गर्नु हुँदैन भनेर तिनले बारम्‍बार जोड दिएका छन्। तिमी किन भनेको मान्दैनौ? प्रभुमाथिको तिम्रो विश्‍वास सामान्यतया दह्रिलै छ, तर तिमी मबाट टाढा बसेको एक महिना पनि भएको छैन, र पनि तिमीले पूर्वीय ज्योतिलाई सम्पर्क गरिसकेकी छ्यौ! याद गर, हामी दुवै प्रभु येशूको प्रतीक्षामा छौँ, तर उहाँ आउनुभयो भने पनि, उहाँ पूर्वीय ज्योतिले दाबी गरेजस्तो देहमा आउनुहुनेछैन।” त्यसपछि मैले जे भने पनि, उसले सुन्‍न मानेन। अन्त्यमा, हामीले खिन्‍न हुँदै फोन राख्‍यौँ।

मेरो ब्वाइफ्रेन्डले किन त्यस्तो प्रतिक्रिया दियो मैले बुझ्‍न सकिनँ, र यसबाट मलाई निकै दुःख लाग्यो। के उसले प्रभुको पुनरागमनको प्रतीक्षा गरेको थिएन र? प्रभु कसरी फर्केर आउनुहुनेछ भन्‍ने विषयमा कुरा गर्दा नै किन उसले त्यति विरोध गर्‍यो? त्यो रात, म ओछ्यानमा पल्टिएँ तर सुत्‍नै सकिनँ, त्यसकारण म परमेश्‍वरको वचन पढ्न उठेँ, अनि एकदुई वटा खण्डहरू भेटेँ: “जहाँ परमेश्‍वर देखा पर्नुहुन्छ, त्यहाँ सत्यता व्यक्त हुन्छ, र त्यहाँ परमेश्‍वरको आवाज हुनेछ। केवल सत्यतालाई स्वीकार गर्नेले मात्रै परमेश्‍वरको आवाजलाई सुन्न सक्नेछ, र यस्ता मानिसहरू मात्रै परमेश्‍वर देखा पर्नुहुने घटनालाई देख्‍नको लागि योग्य हुनेछन्” (वचन, खण्ड १। परमेश्‍वरको देखापराइ र काम। परिशिष्ट १: परमेश्‍वर देखा पर्नुभएको घटनाले नयाँ युगलाई प्रारम्भ गरेको छ)। “आखिरी दिनहरूका ख्रीष्‍टले जीवन ल्याउनुहुन्छ, अनि सत्यताको चिरस्थायी र अनन्‍त बाटो ल्याउनुहुन्छ। यही सत्यता नै मानिसले जीवन प्राप्त गर्ने मार्ग हो, र यो एक मात्र मार्ग हो जसमार्फत मानिसले परमेश्‍वरलाई चिन्‍नेछ र परमेश्‍वरद्वारा ऊ अनुमोदित हुनेछ। यदि तँ आखिरी दिनहरूका ख्रीष्‍टले प्रदान गर्नुहुने जीवनको बाटो खोजी गर्दैनस् भने, तैँले कहिल्यै पनि येशूको स्वीकृति प्राप्त गर्नेछैनस्, र तँ स्वर्गको राज्यको प्रवेशद्वारभित्र छिर्न कहिल्यै योग्य हुनेछैनस्, किनभने तँ इतिहासको कठपुतली र कैदी दुवै होस्। नियम र वचनहरूको नियन्त्रण र इतिहासको बन्धनमा हुनेहरूले कहिल्यै पनि जीवन प्राप्त गर्न सक्‍नेछैनन् न त तिनीहरूले जीवनको अनन्त बाटो नै पाउन सक्‍नेछन्। यस्तो किन हुन्छ भने तिनीहरूसँग सिंहासनबाट बग्‍ने जीवनको पानी नभई धमिलो पानी मात्रै छ, जसमा हजारौँ वर्षदेखि टाँसिएका छन्” (वचन, खण्ड १। परमेश्‍वरको देखापराइ र काम। आखिरी दिनहरूका ख्रीष्‍टले मात्रै मानिसलाई अनन्त जीवनको बाटो दिन सक्‍नुहुन्छ)। मैले बारम्‍बार परमेश्‍वरका वचनहरू मनन गरिरहेँ, अनि यी वचनहरू अत्यन्तै राम्रो र अत्यन्तै व्यावहारिक लाग्यो! आखिरी दिनहरूमा, प्रभु येशू मानिसहरूलाई मुक्ति दिन सत्यता व्यक्त गर्न आउनुहुन्छ। सत्यताको तृष्णा गर्ने र परमेश्‍वरको आवाज सुन्‍नेहरूले मात्रै परमेश्‍वरको देखापराइलाई देखेर प्रभुको पुनरागमनलाई स्वागत गर्नेछन्। प्रभु बादलमा आउनुहुन्छ भनेर अज्ञानी भई प्रतीक्षा मात्र गर्ने तर सत्यताको खोजी नगर्ने वा परमेश्‍वरको आवाज नसुन्‍नेहरूले प्रभुको आगमनद्वारा प्रदान गरिएको उचाली लगिने मौका गुमाउनेछन्, र प्रभुको पुनरागमनलाई कहिल्यै स्वागत गर्न सक्‍नेछैनन्। यस बेला, मलाई प्रभु येशूले भन्‍नुभएको: “मेरा भेडाले मेरो सोर सुन्छन्, र म तिनीहरूलाई चिन्छु र तिनीहरूले मलाई पछ्याउँछन्” (यूहन्‍ना १०:२७)। भन्‍ने वचन र प्रकाशको पुस्तकमा गरिएको अगमवाणी याद आयो: “हेर, म ढोकामा खडा हुन्छु र ढकढक्याउँछु: यदि कसैले मेरो स्वर सुन्‍छ र ढोका खोल्‍छ भने, म उसकहाँ भित्र आउनेछु र म उसँग खानपान गर्नेछु र उसले मसँग खानपान गर्नेछ” (प्रकाश ३:२०)। वास्तवमा, प्रभुको आगमनलाई स्वागत गर्ने विषयमा रहेको सबैभन्दा महत्त्वपूर्ण कुरा भनेको परमेश्‍वरको आवाज सुन्‍नु हो। परमेश्‍वरका भेडाले परमेश्‍वरको आवाज सुन्‍न र उहाँका पाइलाहरू पछ्याउन सक्छन्। मलाई मेरो ब्वाइफ्रेन्डले सर्वशक्तिमान् परमेश्‍वरका वचनहरू नपढेकोले साँचो मार्गको खोजी र अनुसन्धान गर्न इन्कार गरेको हो भन्‍ने लाग्यो। यदि ऊ परमेश्‍वरको भेडा र साँचो रूपमा सत्यताको खोजी गर्ने व्यक्ति हो भने, मैले उसलाई सर्वशक्तिमान् परमेश्‍वरका केही वचनहरू देखाउनुपर्छ। यदि उसले सर्वशक्तिमान् परमेश्‍वरका वचनहरू सत्यता र परमेश्‍वरका आवाज हुन् भनेर चिन्यो भने, उसले सर्वशक्तिमान् परमेश्‍वरका आखिरी दिनहरूको कामलाई स्वीकार गर्न सक्‍नेछ, र हामीले सँगै परमेश्‍वरका पाइलाहरूलाई पछ्याउन सक्‍नेछौँ। त्यसकारण, मैले सर्वशक्तिमान्‌ परमेश्‍वरका केही वचनहरू कपी गर्दै र ती उसलाई पठाउँदै धेरै रात बिताएँ। त्यसपछि, हरेक दिन, उसले मसँग परमेश्‍वरको आखिरी दिनहरूको कामको बारेमा अनुसन्धान गर्न मलाई कल गर्ला भनेर पर्खिरहेँ। केही दिनपछि, घरको फोनमा घण्टी बज्यो, र मलाई निकै खुशी लाग्यो। मलाई त मेरो ब्वाइफ्रेन्डले कल गरेका होला भन्‍ने लागेको थियो, तर स्यानले कल गरेका रहेछन्। तिनले भने, “तिम्रो ब्वाइफ्रेन्डले भनेको, घर फर्केपछि त तिमीले पूर्वीय ज्योतिका मानिसहरूलाई भेट्यौ अरे। के यो कुरा साँचो हो?” मैले भनेँ, “मैले खोजी र अनुसन्धान गरिरहेकी छु। मलाई लाग्छ, प्रभु येशूको पुनरागमन अत्यन्तै महत्त्वपूर्ण विषय हो र यो हामीले गम्‍भीर रूपमा खोजी र अनुसन्धान गर्नुपर्ने कुरा हो।” स्यानले भने, “यदि तिमी साँच्‍चै नै पूर्वीय ज्योतिको कुनै मानिसको सम्पर्कमा आएकी हौ भने म तिमीलाई भेट्न चाँडै तिम्रो गाउँ आउँदै छु। म तिम्रो पाष्टर हुँ, त्यसकारण मैले तिम्रो जीवनको लागि जिम्‍मेवारी लिनुपर्छ।”

मलाई स्यान साँच्‍चै आउँछन्‌जस्तो लागेको थिएन, किनभने म बसेको ठाउँ निकै टाढा थियो। अनपेक्षित रूपमा, तिनी चाँडै आए। धेरै जना ब्रदर-सिस्टरहरू र मैले यसलाई सर्वशक्तिमान् परमेश्‍वरका आखिरी दिनहरूको कामको गवाही दिने मौकाको रूपमा लिन चाहेका थियौँ, तर हामीले स्यानलाई भेटेपछि, तिनले मलाई पूर्वीय ज्योति ग्रहण गर्‍यौ कि गरेनौ भनी सोधे, र अहङ्कारी रूपमा भने, “म धेरैपटक पूर्वीय ज्योतिको सम्पर्कमा आइसकेको छु। खुलस्त भन्‍नुपर्दा, मैले तिमीलाई भेट्नुभन्दा पहिले, म उत्तरपूर्वका एक जना सिस्टरको घरमा गएँ। उनका भाइले पूर्वीय ज्योतिमा विश्‍वास गरेका रहेछन् र तिनले मलाई तिनीहरूको सुसमाचार सुनाउन चाहन्थे। मैले ईश्‍वरशास्‍त्रको अध्ययन गरेको छु, म बाइबलप्रति परिचित छु, र मैले विदेशमा धेरै प्रतिष्ठित पाष्टरहरूलाई भेटेको छु, तैपनि तिनले अझै पनि मलाई धोका दिन र मेरो मन जित्‍न सक्छु भन्‍ने सोचेका रहेछन्? कस्तो हाँसउठ्दो कुरो।” मेरा ब्रदर-सिस्टरहरूले तिनलाई यसो भन्दै मनाउन प्रयास गरे, “धेरै ब्रदर-सिस्टरहरूले तपाईंलाई सुसमाचार प्रचार गरिसकेका र प्रभु येशू फर्केर आइसक्‍नुभएको गवाही दिइसकेका रहेछन्। खोजी र अनुसन्धान नगरी तपाईंले विरोध गर्नुहुन्छ र दोष दिनुहुन्छ भने, के तपाईंले साँच्‍चै नै प्रभुलाई स्वागत गर्ने प्रयास गरिरहनुभएको छ त? प्रभु येशूले भन्‍नुभयो: ‘आत्मामा गरिब हुनेहरू धन्यका हुन्: किनभने स्वर्गको राज्य तिनीहरूकै हो’ (मत्ती ५:३)। हामी आखिरी दिनहरूमा छौँ, र प्रभु फर्केर आइसक्‍नुभएको छ। मानिसहरूले प्रभु फर्केर आइसक्‍नुभएको छ र उहाँले धेरै सत्यता व्यक्त गर्नुभएको छ भनेर गवाही दिएको सुन्दा, हामीले मन खोलेर खोजी गर्नुपर्छ, ताकि हामीले प्रभुको आवाज सुन्‍न र उहाँको देखापराइलाई देख्‍न सकौँ! यदि हामीले खोजी वा अनुसन्धान गर्दैनौँ, तर अन्धाधुन्ध इन्कार र विरोध गर्छौँ भने, हामीले सहजै फरिसीहरूका पाइला पछ्याउन सक्छौँ। परमेश्‍वर बुद्धिमान्‌ परमेश्‍वर हुनुहुन्छ, उहाँका विचारहरू मानव विचारभन्दा धेरै पर छन्, र परमेश्‍वरको काम एक रहस्य हो जसलाई मानवले बुझ्‍न सक्दैन। हामी तपाईंसँग प्रभु येशूको पुनरागमनलाई कसरी स्वागत गर्ने भन्‍नेबारेमा छलफल गर्न चाहन्छौँ।” तर स्यानले सुन्दै सुनेनन्। तिनले भने, “यदि तपाईंहरू मसँग पूर्वीय ज्योतिको बारेमा कुरा गर्न चाहनुहुन्छ भने, दुःख नगर्नुहोस्, किनभने म तपाईंहरूसँग छलफल गर्नेछैनँ।” तिनले अत्यन्तै विरोध गर्छन् र तिनीसँग खोजी गर्ने कुनै अभिप्राय छैन भन्‍ने कुरा ब्रदर-सिस्टरहरूले बुझे, त्यसकारण तिनीहरूले तिनीसँग कुरा गर्ने प्रयास गर्न छोडे। यस बेला, स्यानलाई कल आयो, अनि तिनले उत्तरपूर्वको एउटा मण्डलीका केही विश्‍वासीहरूले पूर्वीय ज्योतिलाई ग्रहण गरेकाले तिनीहरूलाई रोक्‍न आफू जान चाहेको कुरा बताए। तिनले मलाई तुरुन्तै प्‍लेन टिकट किनिदिन अनुरोध गरे। मैले भनेँ, “स्यान, पूर्वीय ज्योतिले प्रभु येशू आखिरी दिनहरूको न्यायको काम गर्नको लागि सत्यता व्यक्त गर्न फर्केर आउनुभएको छ। तपाईं खोजी र अनुसन्धान गर्न, र प्रभुलाई स्वागत गर्न इन्कार गर्नुहुन्छ, त्यसबाहेक तपाईं मानिसहरूलाई साँचो मार्ग खोजी गर्न र परमेश्‍वरको आवाज सुन्‍नबाट बाधा दिन र रोक्‍न चाहनुहुन्छ। के यो प्रभुको इच्‍छाअनुरूप छ?” तिनले मलाई ठूलाठूला आँखाले हेर्दै भने, “म पूर्वीय ज्योतिका मानिसहरूलाई भेडा चोर्न मण्डलीमा आउन दिनेछैनँ। म प्रभुको मार्गको रक्षा गर्न चाहन्छु।” स्यानको अहङ्कारी हाउभाउ देख्दा, तिनी मैले चिनेकै पाष्टर हुन् भनेर विश्‍वास गर्नै सकिनँ। मैले तिनलाई चार वर्षपहिले भेटेकी थिएँ, र मेरो लागि, तिनी विश्‍वासीहरूको वास्ता गर्ने अत्यन्तै नम्र व्यक्ति थिए। म सधैँ तिनी असल र भक्त पाष्टर हुन् भन्‍ने सोच्थेँ, तर तिनको व्यवहार र तिनले आज प्रकट गरेको कुरा देख्दा मलाई प्रभु येशूका वचनहरू याद आए: “शास्‍त्रीहरू र फरिसीहरू, ढोङ्गीहरू हो, तिमीहरूलाई धिक्‍कार छ! किनभने तिमीहरूले मानिसहरूको विरुद्ध स्वर्गको राज्य बन्द गर्छौ: किनभने न त तिमीहरू आफै जान्छौ, न भित्र प्रवेश गरिरहेकाहरूलाई नै प्रवेश गर्न दिन्छौ” (मत्ती २३:१३)। स्यान हरेक दिन मञ्चमा उभिएर मानिसहरूलाई प्रचार गर्दै, प्रभुको आगमनको निम्ति जागा रहनुपर्छ र सचेत बस्‍नुपर्छ भनेर हामीलाई भनिरहन्थे, तर प्रभु येशू साँच्‍चै आउनुभएपछि, तिनले खोजी, अनुसन्धान, वा प्रभुलाई स्वागत गर्ने काम नगरेका मात्र नभई दोष दिने र विरोध गर्ने कामसमेत गरे, र खोजी र अनुसन्धान गर्ने विश्‍वासीहरूलाई बाधा दिन र रोक्‍न हरेक उपाय लगाउने प्रयास गरे। प्रभुको मार्ग रक्षा गर्ने र बगालको सुरक्षा गर्ने नाममा, तिनले मानिसहरूमाथि कडा नियन्त्रण कायम राखेका थिए। तिनी मानिसहरूलाई स्वर्गको राज्यमा प्रवेश गर्नबाट रोक्‍न चाहने दुष्टका दास, अर्थात् त्यो बेलाका फरिसीहरूजस्तै थिए!

मण्डलीमा स्यानको वास्तविकतालाई नचिनेका, तिनको बन्धन र छलमा परेका, र परमेश्‍वरको आखिरी दिनहरूको कामको अनुसन्धान गर्न नसकेका धेरै ब्रदर-सिस्टरहरू छन् भन्‍ने सोचेर, मैले चिनेजानेका ब्रदर-सिस्टरहरूलाई सम्पर्क गरेँ र तिनीहरूसँग सर्वशक्तिमान् परमेश्‍वरको कामको गवाही दिएँ। स्यानले यो थाहा पाएपछि, तिनले मलाई कल गरेर यसो भन्दै धम्की दिए, “यदि तिमी जिद्दी गरेर पूर्वीय ज्योतिमा विश्‍वास गर्छौ र भेडा चोर्न मण्डलीमा आयौ भने, हामी सबैले तिमीलाई इन्कार गर्नेछौँ, र तिमीलाई चिन्‍ने सबै ब्रदर-सिस्टरहरूले तिमीलाई अबदेखि स्वागत गर्नेछैनन्।” त्यसपछि, तिनले मलाई सर्वशक्तिमान् परमेश्‍वरको मण्डलीलाई बहिष्कार गर्ने कार्यलाई बढावा गर्ने धेरै वटा पम्‍प्‍लेटहरू पठाए, र ती सबैमा परमेश्‍वरलाई विरोध र निन्दा गर्ने शब्‍दहरू थिए। यसपछि, मैले स्यानको साँचो अनुहारलाई अझै स्पष्ट रूपमा देखेँ। तिनी मानिसहरूलाई साँचो मार्गको अनुसन्धान गर्नबाट रोक्‍ने बाधा र ठेस लाग्‍ने ढुङ्गा थिए। मलाई अबउप्रान्त तिनीसँग बोल्‍न मन लागेन, त्यसकारण मैले तिनका कलहरू उठाउन छोडेँ। मैले सर्वशक्तिमान्‌ परमेश्‍वरमा विश्‍वास गर्नमा र तिनका अधीनमा रहेका मानिसहरूलाई प्रचार गर्नमा जोड दिएको देखेपछि, तिनी झेजियाङ्ग, शाङ्घाइ, र अरू ठाउँका मलाई चिन्‍ने ब्रदर-सिस्टरहरूको घरमा गए र तिनीहरूलाई मलाई सम्पर्क नगर्न वा मेरो प्रचारलाई नसुन्‍न आदेश दिए। विदेश फर्केपछि, तिनले मेरो लागि मण्डलीको ढोका बन्द गरे। तिनले मेरो कल उठाउन वा मलाई सम्पर्क गर्नबाट सबैलाई निषेध गरे, र मलाई सम्पर्क गर्ने सबैलाई बहिष्कार गरिनेछ भनेर धम्क्याए।

एक दिन, मैले मेरो ब्वाइफ्रेन्डबाट एउटा पत्र पाएँ जसमा लेखिएको थियो, “स्यानले मण्डलीमा भनेको, तिमीले पूर्वीय ज्योतिमा विश्‍वास गर्‍यौ रे, र तिमी पूर्ण रूपमा छलमा परेकी छ्यौ। अबदेखि, हामी ब्रदर-सिस्टर रहेनौँ, र हाम्रो बीचमा कुनै सम्‍बन्ध छैन। म तिम्रो फोन कल उठाउने वा तिमीलाई मेसेज लेख्‍नेछैनँ। तिमी फर्केर आउन चाहन्छौ भने, सबैले तिमीलाई स्वागत गर्नेछन्, र हामीले हाम्रो सम्‍बन्धलाई निरन्तरता दिन सक्छौँ, तर तिमी सर्वशक्तिमान्‌ परमेश्‍वरमा विश्‍वास गर्ने कार्यलाई जोड दिइरहन्छौ भने, हामी हाम्रो सम्‍बन्ध तोड्नेछौँ।” पत्र पढिसकेपछि, मलाई निकै दुःख लाग्यो, त्यसकारण मैले उसलाई कल गरेँ, तर उसले कठोर हुँदै भन्यो, “म बिजी छु। अहिले तिमीसँग कुरा गर्ने समय छैन।” मैले उसलाई सोधेँ, “के हामीले साँच्‍चै यसरी सम्‍बन्ध तोड्न लागेका छौँ?” उसले भन्यो, “यदि तिमी पूर्वीय ज्योतिमा विश्‍वास गर्न छोड्यौ भने, हामीले हाम्रो वर्तमान सम्‍बन्धलाई जारी राख्‍न सक्छौँ। तिमीलाई विदेश आउन सहयोग गर्न म मेरी काकीलाई अनुरोध गर्नेछु। उहाँले यहाँ व्यापार गर्दै हुनुहुन्छ, त्यसकारण तिमी यहीँ आएर बस्‍न सक्छौ। हाम्रो भविष्य सुखमय हुन सक्छ। तर तिमीले सर्वशक्तिमान्‌ परमेश्‍वरमा विश्‍वास गर्न जोड दिन्छौ भने, हामीले सम्‍बन्ध तोड्नुपर्छ। समय लिएर यसबारे सोच।” मेरो ब्वाइफ्रेन्डलाई यति निर्दयी देख्दा निकै नराम्रो लाग्यो। विगतमा, हामी सँगै बस्दा निकै खुशी थियौँ, र उसले मलाई राम्रो हेरचाह गर्थ्यो। ऊ पाष्टरप्रति यति समर्पित हुन्छ भन्‍ने मैले अपेक्षा गरेकी थिइनँ। मैले सर्वशक्तिमान्‌ परमेश्‍वरमा विश्‍वास गरेकै कारण, उसले हाम्रो विगत केही वर्षदेखिको सम्‍बन्धलाई बेवास्ता गर्दै मसँगको सम्‍बन्ध तोड्न चाह्यो। मेरो ब्वाइफ्रेन्डसँग विवाद भएको कुरा मेरो परिवारलाई थाहा थियो, र तिनीहरू सबैले मलाई यसो भन्दै यसमा पनुर्विचार गर्न भने, “तिम्रो ब्वाइफ्रेन्डको जागिर र परिवार राम्रो छ। यदि तिमीले सम्‍बन्ध तोड्यौ भने, भविष्यमा तिमीले यस्तो राम्रो व्यक्ति भेट्टाउँछौ भनेर भन्‍न गाह्रो छ। तिम्रो उमेर छिप्‍पिँदै जाँदै छ, र जीवनसाथी पाउनु सजिलो छैन। तिमीले परिवार सुरु गरेनौ भने, भविष्यमा के गर्छौ होला?” मेरो ब्वाइफ्रेन्डको परिवारले पनि मलाई कल गरेर सर्वशक्तिमान्‌ परमेश्‍वरमा विश्‍वास नगर्न अनुरोध गर्दै भने, “तिमीहरू दुई जना अब त्यति जवान छैनौ। विवाह गर्नेबारेमा सोच्‍ने बेला आएको छ। तिमीहरू दुवैले प्रभु येशूमा विश्‍वास गर्नु राम्रो होइन र? विवाह गरेपछि तिमीहरू खुशी हुनेछौ। किन सर्वशक्तिमान्‌ परमेश्‍वरमा विश्‍वास गर्न जोड दिन्छौ?” दुवै परिवारबाट दबाब आएपछि, के निर्णय गर्ने मलाई थाहै भएन। मैले मेरो पहिलेको मण्डलीमा फर्केर मेरो ब्वाइफ्रेन्डलाई विवाह गर्ने निर्णय गरेमा, उसले मलाई भौतिक रूपमा सुखी जीवन दिन सक्थ्यो, र हामी विदेशमा नै सेटल हुन सक्थ्यौँ। यो त धेरै मानिसहरूको सपना हो, तर यसको कारण मैले परमेश्‍वरको आखिरी दिनहरूको मुक्ति पनि गुमाउनेथेँ, र म जीवनभरि पछुताउनेथेँ! आखिरी दिनहरूमा, परमेश्‍वर सत्यता व्यक्त गर्न, मानवजातिलाई पूर्ण रूपमा शुद्ध पार्न र मुक्ति दिन, र विजेताहरूको समूह निर्माण गर्न दोस्रोपटक देहमा आउनुभएको छ। यो हामीले जीवनमा एकपटक पाउने अवसर हो, र मैले यो मौका खेर जान दिनुहुँदैनथ्यो! तर मैले सर्वशक्तिमान्‌ परमेश्‍वरलाई छनौट गरेँ भने, मेरो विवाह के हुनेछ? म विवाह गर्ने उमेरमा पुगिसकेकी थिएँ, र विवाह जीवनको एउटा प्रमुख भाग हो। त्यो अवधिमा, मलाई खान वा सुत्‍न मन लाग्दैनथ्यो, र मलाई अत्यन्तै पीडा भएको थियो। मेरो उमेरका धेरै जनाले विवाह गरेर परिवार बसाइसकेका थिए तर आफूलाई चाहिँ अझै एकली देख्दा, मनमा निकै अन्तर्द्वन्द्व चल्थ्यो, र के निर्णय गर्ने मलाई थाहा हुँदैनथ्यो। मैले यस विषयमा परमेश्‍वरसँग बारम्‍बार प्रार्थना गरिरहेँ, र मलाई अगुवाइ गर्नुहोस् र अगाडिको मार्ग कसरी छनौट गर्ने त्यो देखाउनुहोस् भनेर अनुरोध गरिरहेँ। मेरा ब्रदर-सिस्टरहरूले मेरो अवस्थाको बारेमा थाहा पाएपछि, तिनीहरू सबैले मलाई सहयोग र सङ्गति दिए, तर मैले अझै पनि मेरो ब्वाइफ्रेन्डलाई छोड्न सकिनँ। मसँग ब्रेक-अप गरेकोमा मलाई रिस उठेको थियो। ऊ मसँग बोल्‍नसमेत छोडेको थियो। ऊ निष्ठुर र निर्दयी बनेको थियो। म छलमा परेकी छु भनेर पाष्टरले भन्दा, मेरो ब्वाइफ्रेन्डले आँखा चिम्‍लेर विश्‍वास गर्‍यो। पाष्टरले उसलाई मलाई इन्कार गर्न लगाउँदा, उसले विगत केही वर्षदेखिको हाम्रो सम्‍बन्धलाई पूर्ण बेवास्ता गर्दै मसँगको सम्‍बन्ध तोड्यो। मैले यसबारेमा जति विचार गरेँ, मलाई त्यति नै दयनीय महसुस भयो।

एक रात, म कोल्टे फेरिरहेकी थिएँ। म सुत्‍नै सकिनँ, त्यसकारण म उठेर परमेश्‍वरको वचनको भजन सुनेँ: “मानिसहरूले अर्थपूर्ण जीवन जिउन खोज्नुपर्छ”:

१  मानिसले अर्थपूर्ण जीवन जिउने प्रयास गर्नुपर्छ र ऊ आफ्‍ना वर्तमान परिस्‍थितिहरूप्रति सन्तुष्ट हुनु हुँदैन। पत्रुसको स्वरूपमा जिउनको लागि, उसले पत्रुसको ज्ञान र अनुभवहरू प्राप्त गर्नैपर्छ। मानिसले अझै उच्‍च र अझै प्रगाढ कुराहरूको खोजी गर्नुपर्छ। उसले परमेश्‍वरप्रतिको अझै गहन, अझै शुद्ध प्रेम, र मूल्य र अर्थसहितको जीवनको खोजी गर्नुपर्छ। यो मात्रै जीवन हो; तब मात्र मानिस पत्रुसजस्तै हुनेछ। …

२  परमेश्‍वरलाई प्रेम गर्न इच्‍छा गर्ने हरेकको लागि प्राप्त गर्न नसकिने सत्यताहरू छैनन्‌ र तिनीहरू दह्रिलो गरी खडा हुन नसक्‍ने कुनै न्याय छैन। तैँले आफ्‍नो जीवन कसरी जिउनुपर्छ? तैँले परमेश्‍वरलाई कसरी प्रेम गर्नुपर्छ र उहाँका अभिप्रायहरू पूरा गर्नका लागि कसरी यो प्रेमको प्रयोग गर्नुपर्छ? तेरो जीवनमा योभन्दा ठूलो विषय अरू कुनै छैन। सबैभन्दा महत्त्वपूर्ण कुरा, तँसँग यस किसिमका आकांक्षाहरू र दृढता हुनैपर्छ, र तँ मेरुदण्ड नभएका, दुर्बल व्यक्तिहरूजस्तो बन्‍नु हुँदैन। अर्थपूर्ण जीवनको अनुभव र अर्थपूर्ण सत्यताहरूको अनुभव कसरी गर्ने त्यो तैँले सिक्‍नैपर्छ, र आफैलाई त्यसरी आलटाल गर्ने व्यवहार गर्नु हुँदैन। तैँले महसुस नै गर्न नपाई, तेरो जीवनले तँलाई छोडेर जानेछ; त्यसपछि के तैँले परमेश्‍वरलाई प्रेम गर्ने अर्को मौका पाउनेछस्? के मरेपछि मानिसले परमेश्‍वरलाई प्रेम गर्न सक्छ? तँसँग पनि पत्रुसको जस्ता आकांक्षाहरू र विवेक हुनुपर्छ; तेरो जीवन अर्थपूर्ण हुनैपर्छ, र तैँले आफैसँग खेलबाड गर्नु हुँदैन। मानवको रूपमा र परमेश्‍वरको खोजी गर्ने व्यक्तिको रूपमा, तैँले आफ्‍नो जीवनलाई कस्तो व्यवहार गर्छस्, तैँले आफैलाई परमेश्‍वरमा कसरी समर्पण गर्नुपर्छ, परमेश्‍वरमा तैँले कसरी अझै अर्थपूर्ण विश्‍वास राख्‍नुपर्छ, र परमेश्‍वरलाई तैँले प्रेम गर्ने हुनाले उहाँलाई अझै शुद्ध, अझै सुन्दर, अझै असल तरिकाले तैँले कसरी प्रेम गर्नुपर्छ भन्‍नेबारेमा होसियारीसाथ विचार गर्न तँ सक्षम हुनुपर्छ।

—वचन, खण्ड १। परमेश्‍वरको देखापराइ र काम। पत्रुसका अनुभवहरू: सजाय र न्यायसम्‍बन्धी उनको ज्ञान

मैले यो गीत दोहोर्‍याई-दोहोर्‍याई सुनेँ। यसमार्फत, मैले पत्रुस जीवनभरि परमेश्‍वरलाई प्रेम गर्ने र सन्तुष्ट पार्ने काममा लागिपरेका थिए, र उनले अर्थपूर्ण र सार्थक जीवन जिए भन्‍ने देखेँ, र यसले मेरो मन छोयो। प्रभु येशूका वचनहरू र कार्यबाट पत्रुसले प्रभु येशू ख्रीष्‍ट अर्थात् जीवित परमेश्‍वरका पुत्र हुनुहुन्छ भन्‍ने पत्ता लगाएका थिए। तिनले प्रभु येशूको लागि प्रचार र काम गरे र यहूदी धर्मको सतावटमा परे, तर तिनले नडगमगाई उहाँलाई पछ्याइरहे। आज, परमेश्‍वर काम गर्न र मानिसहरूलाई मुक्ति दिनको लागि वचनहरू व्यक्त गर्न देहधारी भई व्यक्तिगत रूपमै हाम्रो माझ आउनुभएको छ। मैले परमेश्‍वरका वचनहरू पढेकी, परमेश्‍वरको आवाज सुनेकी, र सर्वशक्तिमान्‌ परमेश्‍वर नै प्रभु येशूको दोस्रो आगमन हुनुहुन्छ भन्‍ने निर्धारित गरेकी थिएँ। तर जब सर्वशक्तिमान्‌ परमेश्‍वर र मेरो विवाहबीचमा छनौट गर्ने समय आयो, म हिचकिचाएँ। मलाई यो विवाह र विदेशमा गएर मेरो ब्वाइफ्रेन्डसँग सुखमा जिउने मौका गुमाउन मन थिएन। मलाई के थाहा भयो भने, मैले धेरै वर्षदेखि प्रभुमा विश्‍वास गरेकी भए पनि, मैले परमेश्‍वरबाट आउने सत्यता र जीवन खोजी गरेकी थिइनँ, न त परमेश्‍वरलाई प्रेम गर्न, सन्तुष्ट पार्न, र अर्थपूर्ण र सार्थक जीवन जिउने कार्यको खोजी नै गरेकी थिएँ। मैले त भौतिक आनन्द र शारीरिक सहजताको खोजी गरेकी थिएछु। मैले परमेश्‍वरका वचनहरू मनन गरेँ: “के मरेपछि मानिसले परमेश्‍वरलाई प्रेम गर्न सक्छ?” मैले आफैलाई सोधेँ, “यदि मैले पृथ्वीमा आफ्‍नो समय परमेश्‍वरलाई प्रेम गर्ने, सन्तुष्ट पार्ने, र अर्थपूर्ण र सार्थक जीवन जिउने कार्यको खोजीमा बिताइनँ भने, मैले आफूले चाहेको विवाह र देहगत सहजता पाए पनि, त्यसको के अर्थ हुन्छ र? मानवजातिलाई पूर्ण रूपमा मुक्ति दिन परमेश्‍वर आखिरी दिनहरूमा आउनु भनेको जीवनमा एकपटक मात्र प्राप्त हुने अवसर हो। यदि मैले यो अवसर गुमाएँ भने, म जीवनभरि पछुताउनेछु! यदि मैले सहज जीवनमा रमाउनको लागि परमेश्‍वरको आखिरी दिनहरूको कामले दिएको मुक्तिको मौका गुमाएँ भने, के यो मूर्खता हुनेछैन र? यदि मैले साँचो मार्गलाई त्यागेर विवाह रोजेँ भने, के मैले साँच्‍चै नै आफूले चाहेको सुखी जीवन पाउन सक्छु त?” मैले केही समयअगाडि सम्पर्क गरेकी एक सिस्टरको बारेमा सोचेँ। उनी र उनको श्रीमानले स्यानको सहयोगमा विवाह गरेका थिए। विवाह गरिसकेपछि, तिनीहरूले ठूलो सहरमा काम गरेर एउटा घर किने। तिनीहरूको आर्थिक अवस्था निकै राम्रो थियो, र मलाई तिनीहरूप्रति डाहा लाग्थ्यो। तर म उनलाई भेट्न जाँदा, उनले मलाई उनी र उनको श्रीमान दुवैले प्रभुमा विश्‍वास गर्ने र राम्रो भौतिक जीवन पाएका भए पनि, तिनीहरू एकआपसमा खुशी छैनन् भनी बताइन्। तिनीहरू ससाना घरायसी कुराहरूमा बारम्‍बार झगडा गर्ने गर्थे, कहिलेकहीँ त झगडा यति खराब हुन्थ्यो कि तिनीहरू एकअर्कासँग बोल्‍न मन गर्दैनथे। पछि उनको श्रीमानले अर्को सहरमा काम गर्न रोजे, र उनलाई दुई वर्षको छोरासँग घरमा एकलै छोडे, त्यसैले उनको जीवन अत्यन्तै दयनीय र एकलो भयो। मैले उनको अनुभवको बारेमा सोचेँ, त्यसपछि मैले चिनेजानेका केही दम्पतीहरूका बारेमा विचार गरेँ, जो प्रायजसो झगडा गरिरहन्थे र एकअर्कालाई डिभोर्सको धम्की दिइरहन्थे। यी तथ्यहरूलाई हेरेपछि, मैले अझै स्पष्ट रूपमा के देखेँ भने, जब हामी प्रभुमा विश्‍वास गर्छौँ र उहाँलाई पछ्याउँछौँ, तब प्रभु येशूले हामीलाई छुटकारा मात्रै दिनुभएको हुन्छ। हाम्रो पाप क्षमा त भएको हुन्छ, तर हाम्रो पापको जड समाधान भएको हुँदैन र हामी पापको बन्धन र नियन्त्रणबाट मुक्त भएका हुँदैनौँ। मानिसहरूले एकअर्कासँग आफ्‍नो भ्रष्ट स्वभावको आधारमा अन्तरक्रिया गर्छन्, र साँचो प्रेम हुँदैन, त्यसकारण हामीले जति नै धेरै देहगत आनन्द अनुभव गरे पनि, हाम्रो जीवन अझै पनि रित्तो र पीडादायी नै हुन्छ। यो कुरा ध्यानमा राख्दै, मलाई अहिले सामना गरेका विकल्‍पहरूप्रति म अत्यन्तै होसियार हुनुपर्छ भन्‍ने महसुस भयो। मैले परमेश्‍वरसँग बारम्‍बार यसो भन्दै प्रार्थना गरिरहेँ, मलाई अगुवाइ र अन्तर्दृष्टि दिनुहोस् भन्दै परमेश्‍वरलाई अनुरोध गरिरहेँ, ताकि मैले उहाँको इच्‍छाअनुसार सही निर्णय गर्न सकूँ।

पछि, मैले सर्वशक्तिमान् परमेश्‍वरका वचनहरूको एउटा खण्ड पढेँ र परमेश्‍वरको इच्‍छा बुझेँ। सर्वशक्तिमान्‌ परमेश्‍वर भन्‍नुहुन्छ: “हिजोआज, खोज्ने र नखोज्नेहरू पूर्ण रूपमा फरक दुई किसिमका मानिसहरू हुन्, जसका गन्तव्यहरू पनि बिलकुलै फरक छन्। सत्यताको ज्ञान खोजी गर्नेहरू र सत्यता अभ्यास गर्नेहरू नै उनीहरू हुन् जसकहाँ परमेश्‍वरले मुक्ति ल्याउनुहुनेछ। सत्य मार्ग थाहा नपाउनेहरू भूतहरू र वैरीहरू हुन्; उनीहरू प्रधान दूतका सन्तानहरू हुन् र विनाशका पात्रहरू हुनेछन्। अस्पष्ट परमेश्‍वरका धर्मी विश्‍वासीहरू पनि, के उनीहरूचाहिँ भूतहरू होइनन्? असल विवेक भएकाहरू, तर सत्य मार्ग स्वीकार नगर्ने मानिसहरू भूतहरू हुन्; उनीहरूका सार परमेश्‍वरको प्रतिरोध मध्येको एक हो। सत्य मार्ग स्वीकार नगर्नेहरू परमेश्‍वरको प्रतिरोध गर्नेहरू हुन् र यस्ता मानिसहरूले धेरै कठिनाइहरू सहे पनि, उनीहरूलाई अझ पनि नष्ट पारिनेछ। … देहधारी परमेश्‍वरमा विश्‍वास नगर्नेहरू भूतहरू हुन्, र, यसको अलाबा, उनीहरूलाई नष्ट गरिनेछन्। विश्‍वास भएका तर सत्यता अभ्यास नगर्नेहरू, देहधारी परमेश्‍वरमा विश्‍वास नगर्नेहरू र परमेश्‍वरको अस्तित्वमा बिलकुलै विश्‍वास नगर्नेहरू पनि विनाशका पात्रहरू हुनेछन्। रहन दिइनेहरू सबै शोधनको कष्टहरू भएर गुज्रेका र दृढ खडा रहेकाहरू हुन्; यी साँचो रूपमा परीक्षाहरूलाई सहेका मानिसहरू हुन्। परमेश्‍वरलाई पहिचान नगर्ने जो-कोही पनि शत्रु हो; अर्थात्, देहधारी परमेश्‍वरलाई पहिचान नगर्ने—चाहे उनीहरू यस प्रवाहभित्रका होऊन् वा यस प्रवाह बाहिरका होऊन्—ऊ ख्रीष्ट विरोधी हो! यदि परमेश्‍वरमा विश्‍वास नगर्ने प्रतिरोधीहरू होइनन् भने शैतान को हो, भूतहरू को हुन्, र परमेश्‍वरका शत्रुहरू को हुन्? के उनीहरू परमेश्‍वरविरुद्ध विद्रोह गर्ने मानिस नै होइनन् र?” (वचन, खण्ड १। परमेश्‍वरको देखापराइ र काम। परमेश्‍वर र मानिस एकसाथ विश्राममा सँगै प्रवेश गर्नेछन्)। परमेश्‍वरका वचनहरूबाट मैले के बुझेँ भने, परमेश्‍वरले आखिरी दिनहरूमा हरेकलाई उसको प्रकारअनुसार अलग गर्ने काम गर्नुहुन्छ। उहाँले देहधारी शरीरद्वारा सत्यता व्यक्त गर्नुहुन्छ र न्यायको काम गर्नुहुन्छ, अनि सामालाई गहुँबाट र झूटा विश्‍वासीहरूलाई साँचो विश्‍वासीहरूबाट अर्थात् सत्यता खोजी गर्नेहरूलाई सत्यता खोजी नगर्नेहरूबाट अलग गर्नुहुन्छ। परमेश्‍वरलाई विश्‍वास गर्छु भनी मुखले भन्‍ने तर सत्यताको खोजी नगर्ने वा परमेश्‍वरको देखापराइको तृष्णा नगर्नेहरू, अनुग्रह खोज्दै आफ्नै रोजीरोटी मात्र माग्‍ने अविश्‍वासीहरू, र सत्यतालाई घृणा गर्ने र परमेश्‍वरको विरोध गर्ने ख्रीष्टविरोधीहरू—यस्ता सबै मानिसहरूलाई खुलासा गरिनेछ, र अन्त्यमा तिनीहरूलाई निकालिनेछ र दण्ड दिइनेछ। बाहिरी रूपमा मेरो ब्वाइफ्रेन्डमा राम्रो मानवता भएको, ऊ इमानदार र भरपर्दो रहेको, र उसले मेरो राम्रो हेरचाह गर्छजस्तो देखिन्थ्यो, तर मैले उसलाई परमेश्‍वर दोस्रो देहधारणमा फर्केर आउनुभएको छ भन्‍नेबित्तिकै, उसले सत्यताको खोजी गर्न इन्कार गरेको मात्र होइन, मलाई परमेश्‍वरको आखिरी दिनहरूको काम स्वीकार गर्नबाट रोक्दै र बाधा दिँदै, मलाई साँचो मार्ग छोडाउन हाम्रो विवाह नहुने धम्कीसमेत दिए। उनले प्रभु येशूमा विश्‍वास गर्ने गरेका भए पनि, ऊ प्रभु येशूको नाममा मात्रै टाँसिइरहेको थियो। उसले फर्कनुभएका प्रभुले व्यक्त गर्नुभएको सत्यतालाई स्वीकार गरेन, र सर्वशक्तिमान्‌ परमेश्‍वरलाई विरोध र दोषारोपण गर्‍यो। मैले उसको सार सत्यतालाई घृणा गर्ने र परमेश्‍वरको विरोध गर्ने सार हो, ऊ परमेश्‍वरको वचनले खुलासा गरेको अविश्‍वासी हो, र ऊ साँचो रूपमा परमेश्‍वरमा विश्‍वास गर्ने, सत्यतालाई प्रेम र स्वीकार गर्ने व्यक्ति होइन भन्‍ने थाहा पाएँ। सत्यताको सामना गर्दा, परमेश्‍वरलाई विरोध गर्ने उसको शैतानी प्रकृति पूर्ण रूपमा खुलासा भयो। उसले परमेश्‍वरको आवाज सुन्‍न सकेन र ऊ परमेश्‍वरको भेडा थिएनन्। यदि मैले त्यस्तो व्यक्तिसँग विवाह गर्ने निर्णय गरेको भए, मलाई परमेश्‍वरले आशिष्‌ दिनुहुन्‍नथ्यो, र हाम्रो वैवाहिक जीवन सुखी नहुनेथ्यो। परमेश्‍वरका वचनहरूबाट, मैले परमेश्‍वरको इच्‍छा बुझेँ। मलाई सहज महसुस भयो, र के निर्णय गर्ने भन्‍ने थाहा भयो। त्यसपछि, मैले मेरो ब्वाइफ्रेन्डलाई कल गरेँ र भनेँ, “मैले निर्णय गरेँ। मैले सर्वशक्तिमान्‌ परमेश्‍वरलाई नै पछ्याउने निर्णय गरेँ। तिमी ब्रेकअप गर्न चाहन्छौ भने, म तिम्रो निर्णयको कदर गर्छु। हामी आआफ्‍नो बाटो लाग्‍नेछौँ।” हताश हुँदै, उसले भन्यो, “यसबारेमा पुनर्विचार गर्न सक्दैनौ? हामी त्यति जवान छैनौँ, र विवाह जीवनको सबैभन्दा महत्त्वपूर्ण कुरा हो। तिमीले हाम्रो विवाहको कुरालाई त्याग्यौ भने, तिमी पछि पछुताउनेछौ।” मैले सत्यतालाई घृणा गर्ने र परमेश्‍वरको विरोध गर्ने उसको सारलाई स्पष्ट देखिसकेकी थिएँ, त्यसकारण उसले जे भने पनि, मैले मन परिवर्तन गरिनँ। मैले भनेँ, “सर्वशक्तिमान् परमेश्‍वरका वचनहरूले मलाई जीवनको मार्ग देखाएका छन्, र मैले यसमा हिँड्ने सङ्कल्‍प गरेकी छु। मेरो निर्णय कहिल्यै परिवर्तन हुनेछैनँ।” आफ्‍नो कुरा सकेपछि, मैले फोन राखेँ, र मलाई गहन सहजता र स्वतन्त्रताको अनुभूति भयो।

परमेश्‍वरका वचनहरूको अगुवाइले गर्दा नै मैले जीवनमा कुन मार्ग लिने भन्‍ने जानेँ, र पाष्टर र एल्डरहरूको साँचो ढोङ्गी रूप देख्‍न सकेँ। तिनीहरू हामीले जागा रहेर प्रभुको पुनरागमनको प्रतीक्षा गर्नुपर्छ भनेर चिच्याउँछन्, तर जब प्रभु आखिरी दिनहरूमा काम गर्न देहमा देखा पर्नुहुन्छ, तब तिनीहरूले खोजी र अनुसन्धान गर्दैनन्। यसको साटो, तिनीहरूले उन्मत्त भई दोषारोपण र विरोध गर्छन्, र साँचो मार्गको अनुसन्धान गर्ने विश्‍वासीहरूलाई रोक्‍न र आफ्‍नो नियन्त्रणमा राख्‍न हरेक प्रयास गर्छन्, अनि परमेश्‍वरको पुनरागमनविरुद्ध विरोध र दोषरोपण गर्ने कार्यमा तिनीहरूलाई पछ्याउन विश्‍वासीहरूलाई जबरजस्ती गर्छन्। तिनीहरू परमेश्‍वरको आखिरी दिनहरूको कामले खुलासा गरेका दुष्टताका दास र ख्रीष्टविरोधीहरू हुन्, र मानिसहरूको आत्मा निल्‍ने भूतहरू हुन्! मेरो ब्वाइफ्रेन्डले पाष्टरको धेरै भक्ति गर्ने गरेकोले, उसले सत्यताको खोजी गर्दै गरेन, परमेश्‍वरको आखिरी दिनहरूको कामविरुद्ध दोषारोपण र विरोध गर्ने कार्यमा पाष्टरको पछि लाग्यो, र परमेश्‍वरमा विश्‍वास गरेर उहाँकै विरोध गर्ने व्यक्ति बन्यो। मलाई बचाउनुभएकोमा, र पाष्टर र एल्डरहरूलाई चिन्‍न, तिनीहरूलाई इन्कार गर्न, र अबउप्रान्त तिनीहरूको छलमा नपर्न मदत गर्नुभएकोमा म परमेश्‍वरप्रति आभारी थिएँ। मैले परमेश्‍वरको आवाज सुन्‍न र प्रभुको पुनरागमनलाई स्वागत गर्न सक्‍नु त परमेश्‍वरले मलाई दिनुभएको महान्‌ कृपा र दया थियो। मैले मेरो हृदयको अन्तस्करणबाटै परमेश्‍वरलाई धन्यवाद दिएँ, र अन्त्यसम्‍मै सर्वशक्तिमान्‌ परमेश्‍वरलाई पछ्याउने मन बनाएँ। पछि, मैले मेरो क्षमताले भ्याइञ्‍जेल सक्दो राम्ररी मण्डलीमा सुसमाचार प्रचार गर्दै र परमेश्‍वरको सुसमाचार फैलाउँदै आफ्‍नो कर्तव्य निर्वाह गरेँ। मलाई सही निर्णय गर्न अगुवाइ गर्नुभएकोमा र मलाई आजको स्थानमा डोर्‍याएर ल्याउनुभएकोमा म सर्वशक्तिमान् परमेश्‍वरका वचनहरूप्रति धन्यवाद टक्र्याउँछु। सारा महिमा सर्वशक्तिमान्‌ परमेश्‍वरलाई होस्!